CARTA A UN MALTRATADOR

 

En 4º ESO estamos a traballar os diferentes tipos de textos e con motivo do "Día da non violencia machista" , decidimos tratar o xénero "epistolar" e así poder escribirlle unha carta a un "maltratador".

Segundo a RAG, "epistolar" significa "carta ou misiva que se escribe a alguén.Antes de escribir a nosa carta, tiñamos que ter claro o tipo de escrito que queriamos facer, centrándonos na estrutura, o contido e a forma que se da neste tipo de comunicación e produción a través do intercambio de cartas.

Está claro que na nosa tarefa non iamos ter contestación, pois o noso receptor é alguén , desgraciadamente, universal, xa que se trataba de facerlle chegar a un maltratador o que pensan del un grupo de rapaces de 15 anos

Aproveitando este traballo, o 25 N leuse unha destas cartas no patio como repulsa á violencia exercida sobre as mulleres. Foi un acto sinxelo pero cargado de emoción porque a seriedade do tema precisábao.

 

Jana Fuentes foi a alumna que escribiu a carta elixida para a realización do acto. Velaquí o seu traballo:

 

Señor Maltratador:

 

Digo señor, aínda que non sexas quen de ser tratado así, como persoa, pois non tes valor nin como home nin como ser humano. Ti, que humillas e denigras constantemente a alguén que non che ten culpa de nada, a alguén que finxes amar, pero como vas amar, se non tes corazón?

 

Creste dono dela, mais non es dono nin de ti mesmo, tan só es un covarde miserable que se refuxia en golpes e ameazas para non ter que afrontar una determinada realidade. Non mereces que ninguén che mostre un mínimo de respecto, non mereces ser ben tratado e non mereces ningunha mostra de cariño, por pequena que sexa.

 

Non necesitas que ela che dea explicacións de nada, porque o amor conleva respecto, e á vista está que ti careces de respecto polos seres humanos que te rodean.

 

Tan só es un corpo carente de corazón cunha mente retorcida, así que o único que che  desexo a ti e aos que se asemellan a ti, é que pasedes o resto das vosas vidas no cárcere, para que non poidamos volver á casa sen medo, sen sentir que nos adentramos nun inferno diario e incesante, un inferno eterno.